A creación de emprego de calidade será unha das grandes prioridades do goberno do BNG, con medidas como a posta en marcha dun Plan de fomento da actividade tecnolóxica e industrial para incrementar en 8 puntos o peso da industria no PIB e xerar 12.000 postos de traballo en sectores estratéxicos da industria galega até 2030.

Tamén lle daremos un impulso ao medio rural e costeiro, mobilizando 100.000 hectáreas de SAU e cun Plan de protección, saneamento e rexeneración das rías.

Poremos fin ao modelo enerxético depredador cun novo modelo enerxético ao servizo do país e respectuoso co medio con medidas como a creación dunha Empresa pública de enerxía, unha tarifa eléctrica galega que abarate a factura da luz a familias e empresas, a creación  de  comunidades enerxéticas e o fomento do autoconsumo, tanto domiciliario como industrial.

Apostaremos polo ferrocarril como medio de transporte de futuro reclamando do Goberno central a modernización do ferrocarril e creando un servizo de cercanías nas áreas urbanas máis poboadas. Ademais, melloramos as frecuencias e liñas do transporte por estrada e crearemos unha tarifa plana de transporte intermodal por 30 euros ao mes. E en materia de vivenda, desenvolveremos un plan para mobilizar vivenda baleira e poñela no mercado a prezos limitados e duplicar as axudas ao aluguer, en particular para a xente moza.

Promoveremos un grande acordo nacional pola lingua galega, que consiga un consenso amplo de todos os axentes políticos, económicos e  sociais galegos para reverter a tendencia de perda de falantes que se vén dando na última década de forma moi acusada e os nosos creadores e creadoras terán un maior apoio da Xunta de Galiza.

Empezaremos por darlle á cidadanía uns medios públicos independentes nos que a dirección da CRTVG sexa nomeada mediante concurso público. Repartiremos xustamente os recursos públicos, sen partidismos nin discriminacións e tamén defenderemos unha sociedade inclusiva, diversa e plural.